32nd of May

Treinta y dos de mayo Kon bukon ra it milagro/ daya hay mabahoe nga misteryo Tungod sa bilog nga kalibutan/ ro adlaw kon febrero ginabuhinan Ugaling iya eang sa Caiyang/ ro inadlaw kon Mayo hay ginadugangan. Treinta y dos de mayo Aeang-aeang nga pyesta ku simbahan/ bangod owa man da sa atong kasuguan Pero di man maako ku gobierno/ nga sanda kara ro ginhalinan Kundi raya nga treinta y dosan/ hay bunga it manami nga katuyuan Nga ro mga pumueoyo it Caiyang/magabuyloganan. O misis it treinta y dosan/ kunta indi mo kalipatan Nakasandig kimo/ bukon it korona nga ginpasa-pasahan Kundi imo guid ro isaea nga katungdanan/ nga indi mautod kada Mayo ro daya nga kasadyahan. O misis it treinta y dosan/ kabay imo madumduman Sa pagbutang kimo it korona/ ikaw mangin huwaran Mangin primera sa paghaead it pangamuyo/ kay Birhen Maria sa simbahan Tungod sa ana nga pag-ampo/ ro Caiyang ginbendisyonan Dugang sa paghiwat ta/ it treinta y dosan Ro mayad nga natabo ku una/aton gina uman-uman  Di baea tagsiielak kato/ ag wa nag-abot rong uean Nangamuyo sa Dios ro inyong katigueangan/  Du pamatbat ag ambahanon daw owat katapusan Mabahoe nga handom ro mga pangamuyo hay pagapamatian Gani ro inadlaw it mayo hay andang ginsugpunan Bisan isaea eang ka adlaw agud may kalipay rong tanan May nagsuksok it eambong ag nagpulis pulisan May nagdaea it tuba halin sa kasanggutan May lapag nga ginpahaum ag pagkaon sa nagutman Pero eabaw kara, ro pagdayaw kay Birhen Maria indi guid mapunggan. Ngani atong misis sa rayang treinta y dosan Sampita man ro iba nga magduaw sa simbahan Owa eon it iba pa nga manami naton adtunan Kundi kon siin ro atong kaeag hay may kaeuwasan. Sa tanan nga pumueoyo it barangay Caiyang Sakop man ro barangay Magubahay ag Camaligan Kon may kapirdihan sa pulitika o sa basketbolan Tanan kita daug sa paghiwat it treinta y dosan  Kabay nga indi magkalipat kon ano ro treinta y dosan Manami guid ro inyong gin-umpisahan/ Ag kon raya hay may katapusan man/ Kabay malipayon guihapon rong kabilogan. Sa akon pagtapos it pagtao kinyo it pamisaea Owa akot ikatao kinyo ag indi man maka promisa Pero makasalig kamo nga ro akong pagpalangga Mabatyagan ninyo paagi sa akong presensya. Saeamat sa mga nakabati ag nagpaeamati  Saeamat man sa mga natak-an magpinamati Saeamat sa raya nga okasyon kon siin kita tanan nagatililipon Bisan ginahueasan, ginatamyaw ko kamo it mayad nga hapon. Saeamat, saeamat, saeamat sa tanan. Koronahan ta eon ro bag-ong misis it treinta y dosan. Pagkatapos it koronasyon kabay indi anay mag-uean Agod hinduna nga gabii kita tanan makapamaylihan.