Primera Palabra

"Ama, patawara sanda bangod owa sanda kasayod ku andang ginhimo." Ku Marso 25, 2013, lagpas sa 8:30 it agahon, si kaibahang Butz Maquinto it DYRU habatian ko nga sa mawraya nga bisaea o tinaga nagtao it paglaygay sa gapamati kana sa kahanginan. "Ama, patawara sanda bangod owa sanda kasayod ku andang ginhimo." Raya nga bisaea hay naghalin sa baba ni Hesus suno sa sugid ni San Lukas 23:34. Ag daya man ro una nga bisaea sa Siete Palabras nga aton igapamaeandungan makaron.  Magaumpisa kita sa pagpamaeandong paagi sa isaeang ka pangutana. Ano ro kaundan it mga tinaga ngara ni Hesus?  Agod makit-an ta ro ginahambae nga kaundan, aton anay himay-himayon ro hauna nga bisaea ni Hesus. Una nga paghimay, kon aton taw-an it igtaeupangod ro tinaga ni Hesus, atong mabinag-binag sa tanan nga imaw nagapanawag bilang unga sa ana nga ama. Kaparehas it maisot nga unga nga sa ana nga pagtinangis imaw nagadaeagan paadto sa ana nga ama. Bilang unga imaw nagapati nga ro anang ama hay ana nga daeangpan. Imaw nagasalig nga ro ana nga ama makapatawhay ag makapahagan-hagan sa anang ginabatyag nga kasakit. Ro hauna nga mga tinaga nga gumuwa sa baba ni Hesus hay nagapamatuod nga imaw hay unga nga maeapit sa ana nga ama. Owa imaw nahadlok magsungkoe o magsugid sa ana nga ama sa ana nga kabudlay. Bukon imaw it isaea ka unga nga magpipi eang sa binit ag magtago ku ana nga ginabatyag.  Pangaywa, sa haunang bisaea ni Hesus, mataeupangdan  naton nga bukon eamang nga maeapit si Hesus sa anang ama kundi nagapamatuod guid nga imaw hay may mapinalanggaon nga ama. Batyag guid ni Hesus nga palangga imaw ku ana nga ama. Ngani kasayod ag kaeobot si Hesus nga maakig guid ro ana nga ama kon masayran na ro natabo kana nga maeain. Sin-o abi nga ama man ro malipay nga ro ana nga sambilog nga unga hay patyon eang nga owa man ngani it saea? Sin-o abi nga ama ro indi maghunahuna nga magbaeos sa maeain nga gin-obra sa mabuot na nga unga?  Pangatlo, sa paghambae ni Hesus nga "Ama, patawara sanda bangod owa sanda kasayod ku andang ginhimo" ginapaabot na sa ana nga ama nga imbes uyangan o kauyaktan ku ama it tyempo ro mga tawo nga naghalit sa ana nga unga hay indi eon lang. Kaysa unahon na nga mag-linagas o maghingabot sa mga maeain nga tawo, hay ro ana nga unga lang anay ana nga paga-ulikdan. Kaysa itao ku ama ro ana nga panueukan sa iba hay sa ana lang guid nga unga. Si Hesus nakasayod nga kon ro ama magapabilin nga nagatueok kana nga ana nga unga, magapangibabaw ro paghigugma.  Ag sa ngaean it paghigugma ku ama sa unga, ro unga nga si Hesus nagahinyo sa ama nga paghigugma man ro itao maskin sa mga naghalit kana. Ag ro pinakamataas nga pagpakita it paghigugma hay ginatawag nga pagpatawad. Ngani mabudlay makapatawad sa tawo kon kueang o owa it paghigugma. Sa raya nga paghimay-himay ta, ano eon ro kaundan it mga tinaga ngara ni Hesus?  Ro pagpatawad isaea ka timaan nga ro mabahoe nga paghigugma hay mas mabahoe pa sa pinaka mabahoe  nga saea. Ro pagpatawad nga ginapangayo ni Hesus sa ana nga ama para sa mga naghalit kana hay isaea ka hueag nga magapadumdom sa tanan nga indi dapat maduea ro paging mahigugmaon bangod eamang sa mga bulok nga ginhimo ku iba. Indi dapat mabayluhan ro gugma it kaakig maskin ano pa ro nagakahanabo nga kaeainan. Ag daya ro sueod ku mga bisaea ni Hesus nga "Ama, patawara sanda bangod owa sanda kasayod ku andang ginhimo." Ro pagpatawad ni Hesus sa mga nagkasaea kana nagatungtong sa owa nagaka-hubas nga paghigugma. Sa punta it tanan, paghigugma ro kinahang-ean agod ro kaugot ag kaakig maumpawan.  Sa raya nga pang-orason, ginahangkat kita it Sta. Iglesia nga magtuead kay Hesus. Kinahang-ean pun-on ta ro atong taguipusuon it paghigugma it ama ku atong Ginuo. Sa kapupun-an eamang it paghigugma nga kita makasarang makapatawad eabi eon sa pinakamabug-at nga saea nga nahimo katon it iba.  Tapuson ko ro akon pag-giya sa pagpamaeandong paagi sa isaea ka pagsugid it hitabo nga akon nabatian sa mag-asawa nga katapo it Bukas-Loob sa Diyos. May mag-asawa nga may maintok pa nga unga. Ro unga hay sueang-hatod ku family driver sa baeay ag eswela. Isaea ka adlaw hakibot sanda nga naduea ro andang unga ag nakit-an eang nga patay eon. Nasayran nga gintabing ru unga it pilit bago pinatay. Ulihi eon hadakpan ro nagmolestya ag nagpatay sa unga. Owa it iba kundi ro andang family driver. Bisan ano ro kaakig ku mag asawa sa family driver nga ginsaligan nanda sa kabuhayon pero nakahimo giyapon kanda it kabahoe nga saea, ginduaw nanda sa prisohan ro driver ag ginpatawad. Kon bukon sanda it maeapit sa Simbahan sigurado kabudlay ro magpatawad. Mga tumueo-o ni KristoHesus, sayod ta nga sa kapupun-an eamang it paghigugma ku Dios, magahalin ro atong ikasarang nga makapaiway ag magapatawad. "Ama, patawara sanda bangod owa sanda kasayod ku andang ginhimo."